يعتبر الكشري المصرى ، من الأكلات المصرية الشعبية التي لا يتخلى عنها جميع الطبقات سواء فقير أو غني ومن أفضل ما يميز الكشري هو أنه يحتوي على سعرات حرارية عالية وتكلفة أقل وبالرغم من مكونات الكشري العديدة إلا أنه يتميز بسهولة تحضيره
فهناك الكثير من محلات الكشري في كل مكان وفي أرقى الأماكن وذلك يرجع لنسبة الطلب إليه فهو الأكله المفضلة عند الموظفين والعاملين وذلك لأن سعره قليل ويشبع الجائع
الكشرى المصرى
هو من العادات المصرية مثله مثل الفول والطعمية التي لا يمكن الاستغناء عنها كما أن الكشرى من الأكلات التى تميز مصر فعند مجيء الأجانب أو زائرين من بلاد الخليج إلى مصر يطلبون أكل الكشري
فيعتبر طبق الكشري من الوجبات المتكاملة لأنه يحتوي على العديد من المكونات المغذية والمشبعة وأنه هو المنقذ لكل ست بيت في آخر الشهر وفي أي وقت أيضآ فعندما تقومي بعمل الكشري في البيت يكون له مذاق خاص ومميز و أوفر و أنضف بكتير من الشارع
- سأقدم لكم اليوم طريقة عمل الكشرى بطريقة أكبر المحلات
خطوات طريقة عمل الكشرى المصرى زى المطاعم
مقادير عمل الكشري المصري بالحمص
- نصف كيلو أرز مصري
- 2 كوب مكرونة (مقصوصة وأسباجتي)
- ربع كيلو حمص الشام
- 2 بصلة كبيره مقطعة جوليان (جوانح)
- نصف أو كوب زيت
- ربع كيلو عدس بجبة
- معلقه كبيره ملح
- شعرية حسب الكميه المناسبة
مقادير صلصة الكشرى المصرى زى المحلات
- 2 معلقه كبيره صلصة
- نصف كيلو عصير طماطم
- نصف معلقة صغيره فلفل اسود
- ملعقة كبيرة ثوم مفروم
- ١ماجى
- قليل من الملح
- كزبرة ناشفة
طريقة عمل الكشرى زى الجاهز🥣
ننقع الحمص فى ماء ساخن قبل عمل الكشري ساعتين أو ثلاثة أو ننقعة في ماء بارد من بالليل وكمان هننقع العدس بجبة وبعدين هتسلقة في مايه وملح وكمون وممكن تعملية زي حمص الشام و تاخذي منه على الكشري والى يفضل تشربى حمص شام
دلوقتى أول حاجه هتعمليها هي أنك تحمري البصل عشان أيه يا قمرايا عشان ناخذ الزيت بتاعة بعد كده هنعمل به الكشري كله بعد ما تحمرى البصل ناخذ شويه من الزيت ونحمر في الشعرية ونكون حاطين نصف كمية العدس على الأرز ونغسلهم
وبعد كده هنحطه على الشعرية بعد ما تتحمر مع شوية ملح وكمون ونحط عليهم المايه بس ما تحطيش مايه كثير عشان العدس بيكون شارب مايه من النقع فيدوب المايه تكون بسوا الأرز والعدس وتسبيه يستوى
وبعد كده هناخد معلقة منين من زيت البصل شطري😉ونقلب فيها باقي العدس ونحط شوية ملح وشوية كمون ونصف معلقة صغيرة ثوم ونحط شوية مايه مش كثير ونخليها على نار هادئه لغاية ما يستوى
بعد كده هنعمل أيه ياحلوي🤣هنسلق المكرونه فى مايه مغلية وعليها شويه ملح وشوية زيت ونحط المكرونة تتسلق بس أوعي تهريها خليها ماسكة نفسها ولما تتسلق نصفيها ونغسلها ونسيبها على جنب
ملحوظه لما تجيء تحطى المكرونة على الكشري سخنى مايه وحطيها فيها ولما تسخن صفيها وحطيها على الكشرى بتكون أحلى من أنك تشوحيها فى زيت
طريقه عمل صلصة🥫الكشرى المصرى فى البيت
وبعدين هنعمل أيه هنعمل الصلصة هنجيب باقي الزيت ونحط معلقة كبيره ثوم مفروم ونقلبها على الزيت لما يبقى لونة ذهبي بعد كده نحط عصير طماطم و ممكن نطش الثوم بشوية خل الأول
وبعد ما تغلى نحط الصلصة والتوابل (والملح والفلفل والماجي والكزبرة )وتغلى غلوتين ونطفي عليها ما تخليهاش تتقل قوي عشان تبقى مظبوطة
شطة الكشرى بأسهل طريقة🌶
وعلشان تعملي شطة الكشرى خذي شوية من الصلصة بعد ما تتعمل وحطي عليها شوية شطة أو قرن فلفل حامي مضروب بالكبة
عمل دقة الكشرى بطريقة بسيطة
نجى بقى للدقة ممكن تعمليها على النار وممكن على البارد أنا بفضل أعملها على النار بحط معلقة زيت وعليها ثوم وقلبها تقلبتين وأطشها بالخل وأحط بعد كده المايه وأول ماتغلى نطفى عليها ونتبلها ( ملح - كمون- كزبره ناشفة)
وبعد ما تبرد أحط عليها عصير ليمون ،
واكون جايبه عيش شامى أقطعة مكعبات ونحمره في الزيت ونرش علية ملح وكمون ويتقدم جنب الكشري بعد كده هقدم الكشري هجيب طبق أحط الأول الأرز بالعدس وعليها المكرونة وعليها العدس و عليها الصلصة
وبعد كده البصل والحمص ويقدم بجانب العيش المحمر وحط معاه طبق دقة وطبق صلصة طبق شطة وبالهناء والشفاء